安德尊同林嘉華老友鬼鬼，兩個大男人咩話題都講得。嘉華哥同老婆Jumbo嚟到電視城，作客大王主持嘅節目《流行都巿》分享近況。
嘉華哥同觀眾一樣咁關心大王嘅戀情，喺佢輕硬兼施逼供之下，一向四兩撥千斤嘅大王，竟然漏口風首度大方認愛，承認另一半就係一直被傳嘅宋芝齡，雖然大王事後話只係隨口講，但嘉華哥笑指大王講嘅嘢就係真。
嘉華哥近日拍一套電影飾演一位慈父，新片上月登陸英國倫敦國際電影節，佢同團隊一齊見證呢個重要時刻，嘉華哥話作品成為精選電影，因為電影節中嘅評審覺得作品值得推薦畀觀眾欣賞。
嘉華哥嘅演技無庸置疑，尤其反派角色更令人睇到恨之入骨，大王都被圈粉，嘉華哥表示冇固定自己要做邊類角色，每次接到劇本，就係演繹另一個人生。
