又一資深演員殞落，曾演出唔少影視作品，亦為舞台劇獻出多年心理血嘅 林尚武 ，傳出因心臟病離世消息，終年75歲。
上月底剛度過生日嘅林尚武1978年由香港浸會書院畢業，之後就加入香港話劇團成為首批全職舞台劇演員。到1989年加入 TVB，服務7年間參演超過40部劇集。包括首部TVB作品《燃燒歲月》扮演「蒲公公」、《橫財三千萬》、《蜀山奇俠之仙侶奇緣》、1994年版《射雕英雄傳》飾演丘處機、《壹號皇庭II》等。
早於1989年，佢就獲藝術家聯會頒發舞台劇「最佳演員獎」。至1994年患上鼻咽癌，康復後因口齒不靈由幕前退居幕后，一直從事節目編劇、編審、演藝教育等工作。到2004年初，林尚武曾因感冒菌入耳，導致右耳失聰，無奈結束劇團，更有指當時曾經歷逾年聾啞生活。
2013年曾有機構向佢頒發「十大再生勇士傑出生命獎」，表彰佢百折不撓嘅生存意志。可惜11月3日傳出林尚武疑因心臟病發去世。
林尚武演出無數，唔少角色提起都令人印象深刻，好似《月兒彎彎照九州》中嘅攝影師光叔、《人在邊緣》嘅韋律師、《同居三人組》嘅萬國定、《蜀山奇俠之仙侶奇緣》中嘅無塵真人、等。佢亦曾於1998年電影《全職大盜》中飾演陳仲德，2002年嘅《夕陽天使》中出演一角。