張繼聰 同 劉皓嵐 作客《StarTalk》接受主播王鎮泉專訪，阿聰分享自己喺電影作品中嘅顛峰之作《金童》，尤其一身嘅肌肉，佢都話而家好難再練返當日嘅身型。戲中跟曾志偉有唔少對手戲，阿聰指志偉哥本身有好多形象、有好多身份，但當佢變成演員去演正劇時，係一位好好睇嘅演員，其中有幾幕戲，當自己剪後期時，都被志偉哥嘅演技觸動。
電影拍攝中途一度停頓，阿聰自資六位數令作品唔會胎死腹中，佢話促使自己咁做，係因為覺得要對自己及為呢部電影付出過嘅人有個交待，所以當後期需要重新再剪接時，嗰筆費用就由佢支付。
講到會否喺電影中得到啟發，反思跟仔女嘅相處，阿聰話當然有，尤其戲中自己唔想令個仔失望，而引發動力去做，佢覺得呢點似自己，正如個仔清楚佢為呢部電影花咗幾多心血去做，就好似一種身教，畀個仔知道鍾意一啲嘢，就全力以赴去做好，唔需要計劃結果係咪成功。阿聰覺得自己跟一對仔女嘅相處好好，好似皓嵐跟爸爸嘅關係一樣，大家嘅關係似朋友。佢又講到個仔細個時對佢有誤解，覺得佢係一個好懶散爸爸嘅原因。
