舒淇 執導嘅首部電影《女孩》為佢奪得釜山電影節嘅「最佳導演」，新片最近喺香港舉行首映，老公 馮德倫 鍾鎮濤一家、呂良偉夫婦、 鄭伊健 黎諾懿 同 余安安 等到嚟撐場。
舒淇話自己唔會緊張大家對新戲嘅評價，因為之前做咗兩個幾月嘅宣傳，要緊張都緊張完，要喊都喊完，自己嘅心情相當輕鬆，反而笑指傳媒朋友冇咁輕鬆，因為要聽佢講廣東話，佢話事前練咗好耐廣東話，雖然平日同老公都係以廣東話溝通，但老公唔會糾正佢嘅發音。問到老公會否包場欣賞？舒淇話：「大家去問佢，可能佢一陣會問我攞飛。」
馮德倫嚟撐老婆場，當然唔只睇戲咁簡單，佢當眾喺戲院嘅分享會中讚老婆，佢話：「導演，你部戲咁成功，又獲獎，會唔會同你完全唔聽我意見有關。」即引起全場大笑，亦閃爆全場。
原來首映禮上，係馮德倫首次欣賞電影完整版。舒淇話老公之前睇初剪版時，畀出嘅意見就係「果然係文藝片。」佢話老公喺欣賞超過兩個半鐘嘅初剪版過程中，完全冇睇手機，呢點令佢好開心。
電影取材於舒淇被家暴嘅童年，雖然舒淇話自己已經釋懷，亦同父母和解，不過老公睇完作品後，難免有啲感觸，因為以前舒淇帶老公回台灣探父母時，老公會覺得佢對父親講嘢態度差，但自從看完作品後，就明白箇中原因。