胡定欣上月6號宣布與拍拖年幾嘅外科醫生男友陳健華（Akin）於新西蘭南島皇后鎮結婚，早前陸續約黎耀祥、胡杏兒飯聚分享新婚喜悅，杏兒更送上龍鳳鈪祝賀好姊妹新婚，定欣與Akin經洪永城及林盛斌（Bob）介紹之下認識，撥行大葵扇撮合定欣嘅呢段良緣，洪永城早前話唔需要畀媒人利是，叫定欣請食一餐非常好食嘅晚餐就夠，定欣兩公婆即請兩大媒人食飯。
定欣日前帶同老公與媒人Bob、Bob嫂黃乙頤（Pearl）、洪永城、梁諾妍（Inez）兩公婆相聚，Bob嫂更指老公心情開心過自己結婚，而洪永城笑指「任務完成」，恭喜晒陳生陳太：「Mission completed!!❤️❤️❤️ 介紹完，而家婚都結埋，食埋慶祝飯啊，下一步做啲咩?打網球啦 mixed double 👌，而老婆就要滑雪😌😌 識做啦。」原來Inez想去旅行，洪永城先開口叫三對夫婦結伴一齊外遊，定欣亦馬上答應。
Bob就回想早前曾跟定欣承諾，努力幫佢搵一個好嘅另一半，當時Bob好firm咁話「我講得出，一定會做到」，Bob就恭喜陳醫生、陳醫生夫人，多謝呢對新婚夫婦餐飯，以及送上驚喜禮物，Bob仲話呢晚眾人都好高興，傾到癲咗、食到癲咗，自己都期待咗呢個飯局好耐，終於搞得成，仲再次祝定欣兩公婆幸福快樂、開開心心、甜蜜美滿🥰🥰！
