台慶劇《巨塔之后》喺上個禮拜播映完畢，觀眾不捨劇中一眾演員嘅演技。有份目擊拍攝嘅麥雅緻，亦喺社交平台分享當時跟隨老公張頴康到布拉格拍攝外景嘅開心回憶。
Angie好感恩有隨行去布拉格嘅拍攝，令佢趁機做「跟得夫人」伴隨着老公出外拍外景，仲可以同劇組相處。行程到埗當晚，大家就同劉佩玥食生日飯，第二日大家就去布拉格嘅廣場，坐戶外長枱悠然地食午餐，然後分咗男女子組各自搵節目。
此行令Angie首次認識宣萱，佢話自己跟大家一樣叫宣萱做姐姐，而女子組就係姐姐、阿Moon、嘉嘉同自己，感覺好似返到中學生年代，去行商店互相畀購物意見，Angie仲分享意外驚喜「姐姐真係好少女好可愛，會分享佢讀書年代逛街只會閒逛，未必能隨心所欲購物，而家有能力，但更看重舒適度 ⋯ 」Angie話喺自己眼中，宣萱係大明星，卻任何時間都散發着最親切嘅溫度。
至於男子組就係馬國明、蕭正楠同佢老公張頴康，三位大男人喺教堂旁邊飲住咖啡感受當地文化氣息，三人閒聊工作逸事，短短半日，難得隨心又自由自在咁行吓。
