Bill哥哥吳大強喺11月6號迎嚟74歲生日，特別喺警察體育遊樂會設宴27席同摯友歡度生日，資深傳媒人汪曼玲公開多張生日會盛況照片，唔少圈中人李龍基、楊玉梅、梅小青夫婦、方伊琪、麥翠嫻等到賀，大強幾位孝順仔同太太當然有一齊慶祝，場面溫馨熱鬧。
汪曼玲喺社交平台帖文指大強好少公開搞生日會，今年就突發雅興，與親朋好友共聚，汪曼玲透露大強話自己一世好運，30多年事業順風順水，現在又入娛樂圈，又有一個好老婆Michelle及四條A，四個兒子事業有成，又高大俊朗，在台上一家人溫馨砌蛋糕，令人羡慕不已。
大強喺2022年透過參加《中年好聲音》成名加入娛樂圈，擁有幸福家庭及一門四傑成為熱話，兒子吳偉豪（Ricco）活躍娛圈，大強不時與Ricco父子檔上陣，另外三名兒子亦各有成就，任職消防員嘅長子吳偉諾不僅早前赴緬甸地震救災，早前超強颱風樺加沙襲港期間亦曾代表消防處發言。二仔吳偉言任職飛機師、四子吳偉傑則喺澳洲修讀藥劑兼任模特兒。
