林芊妤（Coffee）為澳洲籍馬來西亞華裔老公翟志榮再度陀B，日前佢舉行性別揭曉兼Baby Shower派對，向一眾好友開心宣布陀B女，一家四口湊成一個「好」字，Coffee今日喺社交平台分享喜訊，透露B女平安💓出世啦！
Coffee呢次懷孕之路並不平坦，懷上二胎曾透露產檢結果顯示胎兒可能有「13號染色體異常」（帕陶氏症），幸好最後詳細報告亦顯示沒問題，令Coffee放下心頭大石，喜迎B女嘅到來，Coffee今日喺社交平台貼出剖腹生B後嘅第一張全家福，指妹妹檢查完暫時健健康康一切安好。
Coffee一次過分享多條影片，見佢老公翟志榮冧爆望住愛女，一時深情對望、一時忍不住親吻愛女面頰，父愛滿瀉！哥哥彥彥對細妹無比溫柔，小心翼翼抱住細妹，當Coffee問彥彥而家係咪愛妹妹多過媽咪，彥彥就話兩個都愛，令Coffee甜到入心！
Coffee目前仍卧床休息緊，指自己噚日生完B，要休息一日先有力氣出Post同大家報平安，而Coffee感激醫護悉心照顧，安全咁帶寶貝嚟到呢個世界 ，佢好想同一班網絡契媽講聲I love you，全靠大家嘅祝福，令Coffee有無限勇氣走過呢段孕期，因為大家真誠嘅祝福，BB健健康康咁出世。
