袁偉豪與太太張寶兒噚晚報喜宣布細仔「袁氹氹」出世啦！佢哋指細仔同大仔「袁咕碌」成個餅印咁，袁偉豪呢日現身慈善騷《歡樂滿東華》綵排，親自同傳媒分享再榮升人父喜悅，兩夫妻有上一胎嘅經驗，呢次情緒未有太緊張。
袁偉豪讚BB腳頭好，工作接踵而來，太太張寶兒而家可以落床餵奶，專心做親子活動，而袁偉豪努力工作，佢覺得時間上配合得唔錯，袁偉豪透露一早安排好擇吉時開刀迎接幼子出世，讚「袁氹氹」好生性，喺佢哋想嘅時間內出嚟。
袁偉豪指細仔出世體重係六磅十三安士，但係佢覺得似係大仔「袁咕碌」出世嗰陣大隻啲，袁偉豪話細仔面形比較精緻、好多頭髮，指細仔跟佢比較似樣，袁偉豪又話之前照超聲波時，啲姑娘見到，已經話「袁氹氹」係爸爸樣嚟。
袁偉豪之後會搵高人為「袁氹氹」起名，佢笑言計埋太太同兩位外傭姐姐，屋企而家係三男三女打和，被問會唔會追番個女，袁偉豪就話希望生多個女，有前世情人就開心，不過呢啲就順其自然。
袁偉豪榮升兩子之父，工作上仍然全心投入，今次為咗慈善，佢同廖家爵、黃昇龍及港姐冠軍陳詠詩等挑戰高難度電單車特技演出，袁偉豪更要駕駛電單車飛越跳台，事前佢都努力增磅配合演出。
