陳煒 近日喺劇集《巨塔之後》嘅反派演出令觀眾刮目相看，同 宣萱 嘅多場正面交鋒戲兩人鬥盡演技，近日更組成「煒萱CP」不時喺宣傳時派福利大受歡迎。
唔經唔覺煒哥已經加入TVB十三年，入行以嚟喺事業有過高低起伏，但人生最幸福美滿一定係嫁予第二任醫生丈夫 陳國強 ，呢日煒哥接受商台節目訪問時罕談兩段婚姻經歷，感激老公對佢所做嘅一切。
煒哥曾經因首段婚姻淡出幕前，至2012煒哥與台灣前夫離婚後復出，一直專注事業對愛情心灰意冷，加上認識現任丈夫時已經47歲，覺得可能真係無人要。點知有次拍《法證先鋒IV》時，透過黃智賢認識陳醫生，對方嘅細心令煒哥由衷感動。
煒哥指嗰時覺得大家都幾啱傾，直至有一日開工時生理痛，痛到頭暈休克全身爆汗非常辛苦，捱完朝早外景返屋企休息，煒哥就打電話問陳醫生應該食啲乜嘢藥，結果中午陳醫生就直接送藥同埋送粥上門，感覺真係關心自己，後來兩人才慢慢開始。
2022年時煒哥90歲嘅爸爸病逝，佢慶幸當時有另一半陪伴，亦感激陳醫生愛屋及烏，之前爸爸坐骨神經痛到行唔到，自己要開工無時間，陳醫生亦特登趁lunch break由將軍澳到屯門照顧煒哥爸爸，令佢感激又感動。
煒哥認為首段婚姻失敗是缺乏溝通，而陳醫生亦有過一段婚姻，雖然兩人都內向型人格，但而家夫妻會無所不談，每日發生嘅事都會分享，煒哥坦言：「我所有拍戲拍檔，尤其係男對手，都一定會識得我老公。」講到夫妻婚前有沒有考慮過有下一代，煒哥就話：「佢自己有下一代啦，我真係無乜點諗過，而家我哋兩個幾自由吖。」
