何超雲 2022年爆出與高級消防隊長Douglas訂婚後，一直都打得火熱，Douglas更成功融入超雲嘅生活，除咗好友相聚時會一同出席外，何家嘅活動亦會見到Douglas嘅身影。不過早前就有網民發現，超雲已一段時間冇喺社交平台放閃，就連以前嘅兩人合照都被刪除，故傳出二人感情生變。
正當大家猜測超雲嘅感情生活時，原來佢早已有新戀情喇！超雲嘅新歡係來自台灣嘅型男Jony，兩人疑已拍拖大半年，男友不時會晒出同超雲嘅甜蜜旅行片段。7月同遊泰國時，就齊齊到打卡熱點Mahanakhon SkyWalk，糖黐豆相擁欣賞曼谷夜景，當時Jony仲超甜咁喺帖文中向女友超雲示愛：「Fly into the clouds」
而8月嘅葡萄牙同法國之旅就更為甜蜜，佢哋除咗去欣賞唔同古蹟景點外，兩人喺巴黎鐵塔下，手持大束紅色心心氣球嘅相片，驟眼睇勁似要求婚嘅節奏。
到10月嘅京都之行，超雲同Jony齊齊換上日本和服影靚相，當中一張Jony為女友撐起白色紙傘再雙雙回望，唔只畫面唯美，Jony喺帖文嘅「告白」更加係糖分超標，佢先指兩人相戀嘅時光係自己最鍾愛嘅畫面：「6 months still my favorite view.」，然後又指數月間同超雲一齊出遊，一齊走過唔同嘅城市，令大家更懂彼此嘅節奏。
超雲嘅新歡來頭唔少，對方早年曾與友人創立新型態音樂派對品牌，專門尋找神祕場地舉行派對同展覽。之後Jony再創辦豪華房地產銷售品牌，專注銷售由台灣貴客珍藏嘅限定釋出豪宅，近年佢公司唔止拓展日本豪宅買賣，更有意進軍香港嘅頂級豪宅市場。
