一個盛大嘅視壇頒獎禮喺北京隆重舉行，邀請到近百位內地電視劇界同綜藝界嘅紅星赴會，包括楊冪、黃曉明、姚晨、胡杏兒、王鶴棣、侯明昊、關曉彤、張凌赫、白鹿、祝緒丹、林允、高偉光、毛曉彤、秦海璐、胡軍、楊超越等。
近年《新聞女王》、《執法者們》等劇集，喺內地都有唔錯嘅迴響，所以宣萱、馬國明同高海寧亦受邀出席，當宣萱見返2013年一齊拍內地劇集嘅倪虹潔，就表現得相當興奮，倪虹潔仲喺微博上載咗呢次佢哋重逢嘅合照。馬國明同宣萱同時獲頒「年度風尚演員」，而高海寧則換上黃色晚裝，同一眾內地小花一同獲頒「年度魅力演員」 ，由於佢有份參演嘅台慶劇《新聞女王2》即將首播，所以高ling都有把握機會向大家推薦呀。
