資深藝人「Benz雄」許紹雄於10月28日病逝，本月17日設靈翌日大殮火化，原來許紹雄早喺8月錄影一個有關醫學知識嘅港台電視節目時，當主持鄭萃雯提到腎病話題，一向豁達開朗嘅許紹雄大方透露自己患腎癌。
節目首集嘉賓就係剛離世嘅許紹雄，當日佢同港大醫學院臨床醫學學院內科學系臨床教授葉逸軒對談。呢集食材主題係「豉油」，節目有廚師炮製一道「焦糖醬油朱古力布朗尼」畀大家品嚐，其味道之新奇，令許紹雄一度只顧食甜品，當談及腎病話題，許紹雄透露： 「呢個已係去年嘅事。某日我發現小便顏色好深，起初仲以為自己太熱氣，但係過咗兩星期情況都冇改善，當時我茫無頭緒。」
許紹雄喺節目中忍唔住發揮風趣幽默本色，佢笑言自己唯一缺點就係「聽女人話」，聽太太叮囑必須去認真檢查一下，許紹雄亦要照做，直至檢查過後，醫生發現許紹雄小便有血，佢續言：「嚇咗我一大跳！後來檢查發現我其中一邊腎臟出現陰影，再進一步檢查後，原來係腫瘤。」許紹雄話慶幸當時癌細胞冇擴散到其他地方，所以接受醫生建議，進行腎臟切除手術。
許紹雄憶述當時做完手術翌日已可以落床，連醫生都不禁稱奇，「醫生問我點解咁厲害，我回應『應該係你 (醫術)比較厲害吧』」，而許紹雄妙人妙語亦惹得在場眾人哄堂大笑。許紹雄仲話接受大手術未有影響心情，自己仲當係「拍戲而已」，許紹雄認為既然問過醫生建議，自然要信任對方專業判斷，冇必要多疑。
同席嘅葉逸軒教授作為腎科專科醫生，提醒單腎人士要注意嘅地方，尤其避免攝取過量嘅鈉，並且要注意高血壓、蛋白尿嘅情況。許紹雄當時亦趁機向教授請教蛋白尿嘅判斷方法。