衛蘭 正忙於到各地舉行巡迴演唱，要保持最佳狀態以及一把靚聲一啲都唔易。早前Janice就喺巡演期間抽空拍攝潤喉蜜廣告，更大賣口乖。除咗作息同飲食習慣之外，Janice出埠必定帶住幸運熊公仔，仲會一齊瞓，有次試過喺酒店房唔見咗，即刻嚇到Janice好焦慮，要打俾經理人求救，好彩後來搵得返。
完成廣告後，Janice會繼續巡演，最後一站選擇返嚟香港舉行，佢解釋：「因為香港係我屋企，留返最好嘅嘢畀呢度。我會為香港站做啲特別嘢，而家錄緊新嘅廣東歌，希望仲可以有英文歌、國語歌，仲會準備新編曲、新衫、新嘅美術設計。」Janice曾透露有意誠邀前老闆兼伯樂 黎明 出山做嘉賓，更希望Leon睇到報導會答應自己。
Janice去年開始轉型成為獨立歌手，過去一年好多嘢都要靠自己，令佢學識主動，事無大小都要自己決定。為咗嘗試更多工作，Janice更唔介意周圍飛，去發掘更多自己唔同面向，雖然有時會感到迷茫，但幸好有信仰以及一班好友鍾舒漫Sherman、王君馨Grace等好姊妹支持。
