揸住超跑招搖過市，自然就吸引唔少愛車之人嘅目光，若果係型男開車，絕對係路上回頭率極高，噚日有網民見到視帝陳展鵬喺尖沙咀揸黑色林寶堅尼，以一身型格貴氣公子打扮，現身尖沙咀鬧市街頭，仲有酒店員工迎接，好有氣派呀！
兩位圈中「愛妻號」展鵬同陳豪近日拍《玫瑰戰爭》，今次展鵬奉旨追女仔，早前受訪時更笑言有新鮮感，可以接觸其他年齡層嘅演員，噚日就有網民見到一頭金髮嘅展鵬，身穿恤衫、黑色西褲及黑皮鞋，披住黃色外套，駕駛黑色林寶堅尼跑車喺尖沙咀鬧市停車，氣場十足，其後仲有一位酒店員工出嚟迎接，從展鵬手上接過車匙，展鵬就昂首闊步入內。
當日展鵬正在開工拍劇，cut機嗰陣即睇playback，唔使埋位嗰陣見到圍觀嘅途人亦有揮手打招呼，而另一位型男陳豪日前都喺鬧市開工，之不過佢就喺人來人往嘅旺角人行天橋，企喺一邊呆住首飾，沉思良久後又見佢將疑似首飾盒掉落垃圾筒，網民大讚陳豪「法拉利老了還是法拉利」，真人真係超級有型！
