台慶劇《金式森林》踏入結局周，郭晉安、羅子溢、陳曉華（Hera）、郭柏妍及何依婷等劇中演員呢日齊現身宣傳活動，眾人又行近fans影大合照，無論簽名及自拍，通通冇托手踭，陳浚霆更獻唱主題曲。
結局周劇情步入高潮，安仔大爆家族掌門人方仰天即將跟大家告別，當初睇劇本嗰陣，佢就同監製商量，想畀觀眾覺得角色離開後仲有啲嘢，後嚟加咗一句重要對白，仲引伸到劇集插曲名叫《還剩一件未做的事》。
安仔與Hera喺劇中呢對老少配，大受觀眾喜愛，現實中對愛情嘅睇法，安仔有新領悟，感情事抱住隨緣態度，安仔覺得相遇唔難，要相戀相處把對方放喺生命嘅第一位，呢個係安仔愛情觀。
龔慈恩同Hera喺最後五集有一個令人意想不到嘅重大變化，龔慈恩一改和善形象，佢覺得角色有變化好好玩，Hera話現場見龔慈恩嘅演繹，成個人呆咗。
《金式森林》星期一至五晚 21:30 翡翠台