年度賽馬盛事婦女銀袋日喺馬場舉行，現身嘅女士們均配合主題戴上優雅禮帽同晚裝，擔任活動大使嘅 高海寧 曾志偉、應屆香港小姐 陳詠詩 施宇琪 袁文靜 李尹嫣 以及 劉倩婷 同老公 李丞責 陳家樂 等盛裝赴會，而 周殷廷 則擔任表演嘉賓獻唱。
高Ling有份主演嘅《新聞女王2》喺翡翠台首播，劇中佢飾演嘅許詩晴轉戰官場任新聞處新聞主任，同上一輯嘅角色演繹好大差異，氣場強勁，喺內地播出後引嚟好大討論度。劇中高Ling會聯同其她對手槍頭對準黃宗澤，雖然高Ling好鍾意對方嘅角色，但有時都會覺得好乞人憎，被佢激到紮紮跳。
曾志偉現身活動時，大方回應好友 陳百祥 日前評論電視圈嘅言論，阿叻指唔需要靠電視台呢個夕陽行業。志偉坦言做人要靠自己，若想有曝光或覺得對自己有幫助可以一齊合作，叻哥係演藝界嘅特朗普，語不驚人誓不休，佢鍾意做第一就由佢做，講好嘢冇人鍾意聽，TVB多人熟識，所以佢講TVB，識咗阿叻咁耐，見慣不怪。
志偉表示現時TVB已經開放與其他平台合作，近年國內興起港風，尤其香港懷舊流行曲，證明觀眾都好鍾意香港以前嘅音樂同電影文化，所以到佢呢個年紀嘅藝人都仍然喺娛樂圈，有份情懷。
另外最近喺節目《攻你上大學》兩位港姐施宇琪同袁文靜首任主持表現得唔錯，而陳詠詩亦即將為《歡樂滿東華2025》作電單車特技表演，幾位港姐完咗比賽無耐就工作不斷，佢哋都話難得可以一齊扮靚靚合體工作。
