黃翠如 近日暫時放低老公 蕭正楠 同囝囝蕭哈哈去到武漢做嘢，身為一個旅遊達人兼吃貨，翠如都有把握時間周圍嘆美食，仲拍片記錄自己嘆地道早餐嘅戰績。
翠如特登早起去當地人推薦嘅雪松路：「我朋友話武漢人早餐唔會食一間，係要逐間逐間食，先算係一個完整嘅早餐。」
翠如喺第一間嗌咗牛肉熱乾麵加三鮮豆皮，仲入鄉隨俗擘開大髀坐喺街邊櫈仔開餐，不過食食下翠如就有投訴，話當地人話佢知正宗熱乾麵唔會超過5蚊，但自己就畀咗26蚊，佢仲搞笑話：「畀番21蚊我。」
之後翠如又食咗牛肉粉、生煎包、綠豆湯，同埋大過塊面嘅梅乾菜扣肉鍋盔，戰鬥力十足。除咗食，翠如當然都有把握時間周圍影吓靚相打吓卡，實行寓工作於娛樂。
