布志綸 新歌《行得走得》近日正式推出，新歌曲風有別於上作《如是因 如是果》嘅典型廣東歌曲風。Alan希望借作品分享作為中年男性，對於生命同生活嘅感悟，呼籲樂迷趁自己仍「行得走得」時，繼續搵屬於自己嘅新篇章。
Alan透露，新歌曲風同今年推出嘅作品有唔同感覺，係同共同監製舒文有關：「我同舒老闆喺呢個 project 入面係好想有一首歌係 positive 啲嘅！」至於主題會用上「行得走得」，係因為舒文見 Alan近年不時同中學同學共聚，感嘆關係難得，同時認為當中嘅歡愉係同一首充滿能量嘅作品吻合。而Alan首次同填詞人Oscar 合作，亦大讚對方為自己帶嚟新睇法。
今次 Alan 再度親自作曲，同以往 Band sound 為主唔同，新歌用上 EDM 曲風，配合 Alan 最擅長嘅結他彈撥，Alan仲話今次有唔少新嘗試：「我仲用咗 Autotune ，對我嚟講係新嘗試嚟，希望在 vocal 上會有少少嘅唔同，帶到唔同嘅效果畀樂迷！」
Alan 為了新歌更碌爆「人情咭」，不只錄音，更邀請一眾圈內圈外好友參與 MV 拍攝，其中就包括其中學同學、樂隊 Yusobeit、Hey Joe Trio 以及佢嘅囝囝 Adam。Alan就話，自己最開心同最鍾意係有呢群親友參與和音：「因為成班人一齊錄音，就好似感受到一大班人團結、浩瀚嘅感覺！」Alan 更特意提到 9 歲兒子 Adam，希望呢次錄音能為囝囝帶嚟一次難忘記憶：「無論佢之後鍾唔鍾意唱歌，但起碼佢記得自己 9 歲入過錄音室錄音！知道唔係樣樣嘢都好似諗咁簡單。」
Alan 笑指：「今次 MV 最特別就係佢一啲都唔似一個 MV！」因今次為 MV 選擇用一個類近生活紀錄嘅方式，拍低自己同朋友行街、踢波，以及同中學同學去加拿大旅遊時嘅輕鬆片段。Alan 解釋，因為歌曲本身就是一個希望能為人帶來放鬆感覺的作品，因而 MV 中亦不想牽涉太多大道理，只要聽完作品或看畢 MV 後，樂迷能得到動力生活便已足夠。
