今日有雜誌以封面報道， 早前受內地人重提廿多年前涉毒投訴致演唱會遭取消嘅 蘇永康 ，被讀者報料指早年曾與「一年約廿多歲靚女」深夜同遊，又指兩人齊齊到便利店買牛奶，再驅車到黃埔一陰暗處齊齊飲奶，閒逛時更拖手又摸腰，態度非常親密。
根據雜誌相片可見，阿公一個Skin Head與近年髮型大有不同，而一身浮跨印花嘅登台衫於市區出現，亦略顯高調。至於女主角就一身淡紫色運動裝，同阿公同行時依舊自在彎腰壓腿。
當新聞令外界嘆息阿公一再受打擊時，原文刊出嘅網誌網站，以及緊隨跟進報道嘅多間媒體都將報道撤回。而翻查阿公嘅社交平台，就可見阿公只於2014年底，結婚前後先留有相同Skin Head髮型，報道中所身穿嘅服裝，亦出現於2024年10月嘅帖文。
阿公當日係為鳳凰衛視主辨嘅2014中華小姐環球大賽擔任嘉賓，相信係事後由珠海返港後，急急搵女。
而此神秘女性，亦已證實為太太 馮翠珊 ，Anita仲於限時動態幽自己一默，寫道「一早醒來，發現一個有趣的考古報道。記者朋友們真厲害，把我們結婚前的古蹟都挖出來了。在此統一回覆：1.多謝大家關心，我們夫妻關係非常穩定、2.2014年我還沒正式成為「蘇太太」，所以還是蘇先生婚前的一段小插曲。」
最後再以一句話將整件事總結，Anita話：「老公，看來你當年魅力沒有法擋，不過最後還是被我收了~」巧妙大氣化解今次事件。