容祖兒 現身尖沙咀 出席一個商場嘅大型聖誕燈飾亮燈儀式，提早感受聖誕氣氛。Joey喺聖誕節會同屋企人一齊去旅行，所以唔擔心會過Lonely Christmas！最近Joey嘅好姊妹 蔡卓妍 盛傳同年輕10歲嘅健身敎練拍拖，Joey話喺Kenny關智斌嘅演唱會後台認識呢位教練，不過就唔會同佢一齊健身，因為自己都有教練。
Joey仲話，阿Sa係會將愛情同友情兼顧好嘅人，以前就算拍拖，都會約朋友食飯，所以唔擔心佢會因為談戀愛而忽略咗朋友。
11月22號係阿Sa嘅生日，Joey因為有工作在身，所以可能去唔到生日會。Joey都有諗過，自己會唔會工作完可以趕到Party尾聲，但又覺得大家已經步入中年，可能需要早瞓，好在大家都同佢講：「如果你嚟，梗係要等你」。
Joey前幾日喺廣州為第十五屆全國運動會開幕禮演出，同新加盟公司嘅曾比特及樂隊Daze in White嘅Felix同Eugene一齊演出，佢都話好難得參與呢項體壇盛事嘅開幕式。Joey就話，大家為演出都留喺廣州準備咗好耐，綵排都綵排咗好多次，開幕式場內氣氛澎湃，亦祝各位運動員可以創出佳績，一切順利。
