海俊傑喺11月8號晚突然喺社交平台上載一條聲淚俱下嘅影片，指其任職化妝師嘅太太 莫家慈 （Effie）患上急性肝衰竭，急需外界捐款幫助，佢指太太經已由香港送往內地醫院等待接受換肝手術，但距離150萬嘅醫療同手術費仲爭一半，事件引起娛樂圈同各界關注。
直至11號凌晨，海俊傑喺社交平台再撰長文，指太太轉院後身體出現變化，已轉入深切治療部，而佢同家人都難以承擔持續增加嘅醫療費用，幸得 未古天樂 曾志偉 及圈內外好友幫忙。
獲海俊傑夫婦愛錫嘅 葉泓聲 ，呢日出席太太 陳樂榣Ally 嘅新店開幕禮時，都有透露事件後聯絡唔到海哥，葉泓聲喺訪問時就趁機向對方講，有咩事需要幫手嘅就開口，自己幫得到嘅會盡幫。葉泓聲指海俊傑兩公婆對佢非常好，自己剛入TVB時，無論演咩角色都好，對方都會畀好多意見佢，又會教佢好多嘢。
葉泓聲指對上一次同海哥海嫂聯絡，正正就係《巨塔之后》，當時海嫂仲讚佢演得好好，葉泓聲指當時對方都仲係好健康同精神，所以當自己聽到對方患病嘅消息時都好唔開心。
Ally逆市擴張生意，呢日就獲圈中好友連詩雅同高晉到賀，而一對仔女亦有現身，Ally話今次用咗好短時期嚟籌備開幕，幸得身邊嘅神隊友老公幫手，佢又指喺事業上老公畀咗好多信心同建議自己，令佢哋喺呢幾年都一齊急速咁成長，Ally仲笑言呢個急速成長係適用於事業同生小朋友上。
