下月初將同藝術發展局委員兼任媒體副總編輯 羅光萍 競逐立法會體育、演藝、文化及出版界議席嘅 霍啟剛 ，繼日前拜候電影界代表分享近年發展同睇法，之後就分別同電視台代表會面。日前更到電視廣播城，了解近年本地電視業務同內容發展以及面對網絡發展帶來嘅挑戰。
霍啟剛同TVB行政主席 許濤、商務營運總經理 蕭世和 、法律及國際業務副總經理 陳樹鴻 以及企業傳訊助理總經理 黃德慧 會面，亦分別到新聞部、《愛．回家之開心速遞》錄影廠，仲有品牌傳播科實地了解拍攝情況，事後佢亦於社交平台分享睇法。佢寫道：
無綫電視TVB係香港跨越半個世紀嘅文化品牌，為我哋創造咗無數經典節目，更培育咗一代又一代嘅台前幕後人才，對香港文化傳播和傳承有絕對的責任和地位。好高興有機會拜訪TVB，多謝許濤主席及管理層分享咗好多寶貴意見，由電視業發展、人才培育到知識版權保護，大家都展現出對推動本地文化同媒體發展嘅滿腔熱誠！
儘管在TVB團隊嘅努力已經帶來非常好嘅成績，但本港影視行業仍然面臨挑戰。我深信，政府將來對電視牌照批核應該要有更整體、長遠嘅規劃，做到規管同發展並行。尤其係《廣播條例》真係要與時並進，持續更新至能夠配合而家瞬息萬變嘅媒體環境，等業界可以更靈活咁回應市場同觀眾嘅需求。
今次交流仲了解到，TVB除咗堅守原有優勢，仲不斷探索新路向，包括體育、電競、AI同科技應用等領域，真係令人期待！相信未來不斷推出更好的內容，也期望政府能夠營造更適當、健康和活躍嘅經營環境，和業界共同努力，香港影視業一定可以再創高峰！
也非常感謝安排，今次能夠同《愛回家》製作團隊、企業傳訊部品牌傳播科團隊交流，了解電視節目製作背後嘅故事，希望大家多多支持香港本地製作嘅影視內容。
已報名競逐體育、演藝、文化及出版界議席嘅，尚有身兼香港作家聯會執行會長、香港藝術發展局委員、香港中通社副總編輯羅光萍。
