李珊珊因驚恐病神穩8年，今年正式復出成立網上頻道，轉戰KOL界，定期都會請老友作客自己嘅直播節目。
作為珊珊好友嘅林保怡(Bowie)亦受邀作客節目，兩人喺TVB合作拍劇《鑑證實錄》、《刑事偵緝檔案IV》嘅年代成為好友，友誼維持了近30年，兩人喺直播上無所不談，從當年拍劇嘅頑皮事跡、到養生話題，直播加時傾足近三個鐘。Bowie透露剛完成同林家棟合作嘅時裝新戲，雖然要戴頭套演出，但喺因為造型上同本人相差甚遠，所以佢都話好幫到入戲，同時佢亦分享為角色做功課嘅要訣，坦言投入角色後必要時要拋開劇本，自然發揮演出。
直播中網民問到Bowie想唔想同 陳慧珊 再續《鑑證實錄》經典，Bowie就即時話唔想，反而透露想同佘詩曼再合作，Bowie以「寧選當頭起」認證阿佘係「大勢」之年。最近因為《新聞女王2》播出，故事原作者 盧詠詩 曾透露，佐治角色原意想搵林保怡演出，所以唔少網民亦希望林保怡有機會演出《新聞女王3》。
另外被問最睇好邊啲新一代嘅演員，Bowie點名大讚 劉俊謙 、 柯煒林 同 梁仲恆 ，佢仲特別大讚柯煒林演出有自己嘅一套，相當有潛力。近排Bowie有三個舞台劇嘅劇本在手，正在挑選接演作品。
而珊珊就於直播中公開感謝Bowie，喺佢患病期間對佢嘅照顧無微不至，2016年時更主動相約一直唔敢外出嘅自己出街同遊赤柱。當時久未出街嘅珊珊遇上傳媒跟拍，佢透露當年此事令佢相當崩潰，但幸好傳媒最後手下留情，未有批評當年佢嘅肥腫身形。
珊珊透露Bowie經常陪伴入院，有次曾經因為有市民喺醫院內偷影令Bowie大動肝火喝停對方。而珊珊鮮有提及今年1月頭自己遇上生關死劫，感謝Bowie竟然敢到醫院，加上每一方面都伸出援手，日後會湧泉相報。珊珊未有透露太多病情，Bowie之後回應話：「你嗰日就死，點知你會唔會真係會死，所以咪即刻衝過來。」珊珊坦言呢段時間專注復出少搵朋友，希望做出啲成績回報朋友嘅支持。Bowie亦分享自己嘅人生低潮，當年林媽媽過身，喪禮上因為擔心傳媒影到親朋，所以靈堂特別加多個簾防止拍攝，Bowie暗示所需嘅費用，對當年嘅佢嚟講係有啲困難，但最終都咬緊牙關加錢安裝，仲話雖然當年好想有朋友幫忙，但最終都係獨力走過難關，佢更鼓勵大家人人都有低潮，只要自己夠硬朗就可以挺過。
