新劇《璀璨之城》最近喺澳門開拍，仲被唔少網民野生捕獲到劇組開工。江美儀日前亦喺社交平台分享同吳卓羲(Ron)與張曦雯(Kelly)嘅合照，並喺帖文中寫上「我們仨」，未知是否代表演一家人。
早前劇組圍讀時，透露Kelly喺劇中將演Ron嘅太太，因為連日來未見原先演Ron媽媽嘅邵美琪出現，外界估計江美儀接棒演繹Ron媽咪嘅角色。 大家都讚三位嘅顏值做一家人相當之賞心悅目，但係亦有網民發現江美儀只係大Ron 8歲，之前喺《名媛望族》中仲係有感情線，Ron演江美儀出軌對象。
呢次再合作美儀竟變成Ron嘅媽媽，未知係咪為咗外表上增加年齡差距，美儀染咗一頭銀色短髮，唔少人都覺得呢個造型同62歲影后葉童神似。有網民翻查過往資料，亦有出現演員挑戰比自己年紀大嘅角色成功，就好似43歲嘅鄧智堅喺《新聞女王2》中，飾演嘅飛爺係一個接近60歲嘅資深傳媒人。
另外，高海寧亦為《璀璨之城》如火如荼拍攝中，為咗新劇佢更將頭髮染黑同剪短至下巴嘅長度，並貼出自己DIY染髮嘅相片，不過唔知係咪因為染髮劑引起敏感，高Ling嘅左眼濕疹復發，又紅又腫。受濕疹困擾多時嘅高Ling喺帖文中表示：「祝大家身體健康 ☺️」
被封新一代劇后嘅高Ling，呢輪要連踩兩個劇組《璀璨之城》同《飛常日誌II》亦要忙於為熱播中嘅《新聞女王2》嘅宣傳，工作超級忙䟿，唔少網民都提點高Ling要照顧好身體，擔心佢壓力過大影響健康。
