第十五屆全國運動會賽事進行得如火如荼，不過喺日前舉行嘅跳水比賽中，就有人留意到被喻為「新一代跳水男神」嘅25歲山東選手練俊杰，竟然同演員 劉俊謙 撞樣撞到好似孖生咁！
有網民喺社交平台貼出練俊杰喺賽事嘅截圖，表示：「有無人諗過平行宇宙嘅自己會做啲咩？劉俊謙就去咗跳水。」從圖中可見，練俊杰五官同輪廓都同阿謙似到十足十，相似程度高達9成，仲有網民嘅媽媽睇到都話：「原來佢（劉俊謙）都跳水㗎？咁多才多藝嘅？」呢個Post一出隨即引起網上熱論，唔少人都話「我以為AI」、「我以為係佢新戲喎」、「我睇嗰陣都覺得佢好似劉俊謙」。
其實阿謙同練俊杰唔只撞樣，兩位個名都有個「謙」字，而且阿謙自細就想成為運動員，唔只喺小學時加入過學校泳隊，仲係賽馬會體藝中學學生。不過阿謙喺中二時由於運動過度令膝頭受傷，自從此被迫暫停游水，喺同學建議下再加入話劇團，令佢對演戲產生興趣，先開始一步一步往演路之路發展。所以有網民為呢單撞樣事件創作出創意滿分嘅名，分別係「劉俊謙多元宇宙」、「劉俊謙種族崛起」！
