台慶劇《新聞女王2》首兩集嘅八層舊樓倒塌事件，取材自2010年嘅馬頭圍道唐樓倒塌事件。當年倒塌意外發生得好突然，四層半高嘅建築物喺短短十多秒內崩塌震驚社會。

為咗營造房屋倒塌嘅逼真效果，劇組各樣細節都做足，喺花絮中所見，現場除咗打造頹垣敗瓦嘅塌樓現場，同出動真嘅搜救犬之外，現場記者堆中除咗見到吳業坤同王敏奕外，當中亦有真主播出現！TVB娛樂新聞台嘅兩位主播賴彥妤同蕭文諾亦客串演出新聞記者，兩位更安排發問飾演政府新聞處新聞主任嘅高海寧，兩人有唔少追訪經驗，所以演起上來都相當之自然。

而劇中要深入險境採訪嘅李施嬅，就話呢場戲比起上一輯《新聞女王》拍攝嘅大型翻巴士意外場口舒服得多，當時氣溫高達40度，施嬅雖然手拎咗小型電風扇降溫，但係佢都講笑話唔辛苦，因為呢日嘅氣溫冇30度呀。