12月7號係「2025年立法會換屆選舉」投票日，政制及內地事務局局長曾國衞聯同各大傳媒代表喺11月13號（今日）齊集電視城，宣布將於下月6號舉行《同心 投票 創未來大匯演》，屆時會七台聯播盛事。記招仲率先播放集合近70位藝人歌手合唱嘅「2025立法會選舉主題曲」，有份參與合唱嘅「中聲」唱將都覺得好榮幸。
周吉佩指成件事真係好難得，因為好少機會同大家一齊入錄音室，好似回到比賽時嘅大合唱時刻，亦齊齊帶出團結感覺，令佢唱得特別開心。第一次參與大型合唱嘅 黃博 ，表示自己喺MV見到 譚詠麟 等前輩身影時，認為自己可以作為其中一員參與錄音真係好榮幸。 黃劍文 就話錄音當日氣氛好好，好期待演出，開心可以為香港呢個家出力。
主題曲改編自 郭富城 嘅歌曲《強》，亦集合多個年代嘅歌手同藝人代表合唱， 戴祖儀 講到女聲部份，因為係Key特別高，每位專業歌手發揮得好有氣勢。 黃洛妍 表示主題曲已經唱到入血，所以聽到原曲都會唱返呢個版本，一定係唱「投入是你」。 羅毓儀 就叫大家一定要聽多啲呢首歌，背下歌詞，到時大匯演可以一齊唱。
善玥澄 就覺得因為原曲已經係一首家傳戶曉嘅歌，所以要唱好都有挑戰性，亦要考量平衡唔好太似原唱，但又要帶到氣氛。曹越 指錄音時見到好多前輩、不同單位蹽自己面前行過，自己都秒變小粉絲，喺前輩身上學習到好多，同感受到好熱血。陸東成 稱熱血之餘，最重要係將投票呢個訊息帶出嚟，令佢感受到強。
