王鎮泉 Jeoffrey每星期為觀眾提供最熱辣電影資訊，中外猛片專訪花絮上映時間全部集齊，TVB娛樂新聞台嘅「電影泉攻略」個個星期陪你睇新戲。

今集泉叔直飛美國洛杉機，同改編驚慄大師Stephen King小說《The Running Man》而成嘅電影《逃亡遊戲》演員Glen Powell見面。

原著早喺1987年被改編成電影，就係阿諾舒華辛力加主演嘅《威龍猛將》，不過改編幅度較大，2025年版本更貼近原著。Glen Powell喺戲中有唔少高難度動作場面都係親身上陣，堅持唔用替身，有好多爆炸場面都係導演同動作組認為非常危險。不過Glen Powell一句：「我搞得惦」就一口氣硬住頭皮拍曬。

過往Glen Powell演出《轟天猛將》、《凌雲壯志：獨行俠》亦有唔少動作戲，佢就話呢啲經驗都令佢喺《逃亡遊戲》更有信心做好。而《逃亡遊戲》同《凌雲壯志：獨行俠》之所以令觀眾感到獨特，佢認為係觀眾喺電影用大量時間確保動作畫面係點樣構圖。Glen Powell仲話，呢套戲唔係一部偶然嘅電影，背後如果冇Edgar Wright或Joey Kaczynski呢啲專業電影人，係唔會花大量時間拍一套咁癲嘅戲。

而Glen Powell除咗演員身份，亦喺德州大學進修中，佢就話預計2027年春天會畢業，宜家要衝刺學業。但因為工作原因，佢目前都只可以遙距上課，不過佢相信下學期可以去參加監考考試。

戲中有一場炸毀成棟大樓嘅場面，Edgar Wright就話感到最有挑戰性嘅唔係佢，因為佢唔係負責處理爆炸場面嘅人，但佢覺得有挑戰之處嘅係要一take過而唔可以出錯，所以最後呈現出震撼畫面要多謝特效團隊花費大量時間布置，令佢可以一邊拍其他鏡頭一邊等，團隊話可以爆，佢就去睇。

新片速遞：
《逃亡遊戲》：本來係普通打工仔嘅Ben為了應付女兒嘅巨額醫療開支，被說服參賽。Ben憑反抗本能、敏銳直覺及過人身手而贏得海量粉絲支持。隨節目收視率飆升，危機亦隨之倍增。Ben唔只要戰勝殺手，仲要戰勝無數想睇住佢被獵殺嘅市民。

《非常盜3》：原班「四騎士」經典陣容再度合體，聯手一眾新世代「00後」魔術師，八人以寡敵眾對抗世上最危險嘅犯罪網絡，各人施展渾身解數，以破格魔術上演一場顛覆感官、鬥智鬥力嘅驚天鑽石劫案，誓要改變世界—— 兩代魔術師帶嚟超乎想像嘅魔術火花。

《世一旅行團》：由姜河那、金英光、車銀等俊男美女聯手主演，幾位認識24年嘅好友喺年滿30歲第一次出國旅行，但一位不速之客玉心突然加入，佢地嘅「夢想之旅」秒即螺旋式地陷入徹底混亂。

本周票房龍虎榜截至11月12號中午，第一位《鐵血戰士：蠻荒廝殺》；第二位《女孩》；第三位《日掛中天》。