黃翠如同蕭正楠嘅寶貝仔蕭哈哈話咁快已經半歲多，步入學行學走嘅階段，兩夫妻唔想錯過囝囝嘅寶貴成長期，一有時間就親力親為湊BB，享受三口子家庭樂。
翠如同阿蕭日常去到邊都帶住阿仔一齊，近日兩夫妻趁住天氣仲未凍、風和日麗，首次帶阿仔去遊沙灘，見蕭哈哈對沙灘感覺充滿新奇，仲出奇地完全唔驚水，一步一步喺沙灘留下足印，肥嘟嘟嘅一雙腳仔，加埋蕭哈哈嘅笑容〝真係超級可愛呀！
爸爸阿蕭抱起囝囝蜻蜓點水式玩水，令蕭哈哈不知幾開心。其中一張合照就曝光BB正面，眼仔睩睩嘅神髓同媽媽餅印一樣，獲網友大讚蕭哈哈好靚仔。見到阿仔呢個表現，作為父母當然好開心，阿蕭都留言大讚蕭哈哈好勇敢又唔怕沙，而且非常喜歡海水，仲搞到爸爸條褲濕晒。
阿蕭笑指陪阿仔放電之餘，又可以同老婆浪漫，自己亦可以健身，簡直係「3 Win」，而翠如就話阿仔係鍾意海嘅「蝦」同「魚」，阿蕭立即話改名叫「蕭正蟹」，令翠如都不禁問：「Sir, your name is Siu Hihi?」單係兩公婆嘅留言互動就睇到網友笑哈哈，同時戥蕭哈哈開心，覺得BB喺一個好幸福嘅家庭環境中成長。
