汪明荃（Liza姐）同羅家英日前出發去不丹拍攝新節目《帶阿姐看世界》，兩夫妻經已喺當地展開行程，寓工作於拍拖，連日嚟阿姐同家英哥去咗好多景點拍攝，除咗欣賞美景之外，其中一站就去到廷布，拜訪嫁去不丹嘅港人，深入了解呢對夫婦喺不丹生活嘅體驗同文化。
由唐卡藝術家Nima Dorji帶領阿姐同家英哥體驗唐卡，家英哥更同不丹球隊進行咗一場刺激熱血嘅賽事，參加比賽嘅仲有不丹國家足球隊隊員Chencho，阿姐喺不丹大開金口，去卡拉OK體驗不丹青年人夜生活，令現場觀眾有幸欣賞到阿姐歌藝，家英哥化身頭號粉絲，喺阿姐背後揮動手機電筒。
家英哥喺行程中對阿姐好貼心，處處常伴阿姐左右互相照應，其中一站兩夫妻就登上坐落於廷布谷南邊山頂，高度51米嘅Buddha Dordenma，亦是世界上最大嘅坐姿佛像之一，佢哋又走訪國家紀念佛塔National Memorial Chorten，紀念不丹第三任國王，呢個地方係廷布人嘅心靈地標，每日都有本地人去轉經祈福，阿姐同家英哥亦入鄉隨俗跟住祈福。
