張文慈近年轉戰內地發展，積極經營直播帶貨，忙於工作之餘，不時返港陪伴老父，噚日張文慈透露自從繼母回天家後，佢已搬回香港跟爸爸同住，陪伴及照顧爸爸起居飲食。
張文慈喺社交平台貼出多張跟爸爸嘅合照，見佢陪爸爸返教會、行街買餸，又一齊喺屋企食飯，張文慈目前工作要兩邊走，盡量多陪爸爸，張文慈覺得冇任何嘢比爸爸身體健康、開開心心更重要，希望陪伴爸爸盡快走出喪偶憂傷。
張文慈喺家中有四兄弟姊妹，父母喺佢四歲嗰年離異，從細由嫲嫲照顧，張文慈講過自己冇結婚亦唔算有錢，不過佢好感恩擁有健康、有工作能力，可以照顧家人，可見佢確係圈中孝順女。
