應屆港姐季軍、27歲「得意妹」袁文靜（Jane）最近主持TVB節目《攻你上大學》以半鹹淡口音突圍，袁文靜早排喺社交平台透露為拍攝全日企足七、八粒鐘，呻開工辛苦，日前就宣布將重返教書行業，即惹嚟退出娛樂圈猜測，袁文靜亦作出回應，表示「我還要繼續教書」呢個講法，似乎引起一啲誤會！
袁文靜早前分享工作日常，喺社交平台上載「在TVB做女藝人到底有多辛苦｜待機10am-3am」為題嘅影片，大呻娛樂圈開工辛酸，又話自己遇上生理期仍堅持企足八粒鐘拍攝，凌晨3點先收工，腿痛到忍唔住喊，見袁文靜日前發文宣布將重返教書行業，唔少網民以為佢頂唔順要退出娛樂圈。
袁文靜解釋只係想好好利用早上空閒時間，指教書工作因參選港姐停咗好耐，而家藝人工作已經穩定，佢最近一個月每日早上10點學日語，發現之前早起身唔夠自律，感覺冇做啲咩嘢，所以佢先考慮做回老本行教吓書，並非打算放棄藝人工作、回歸全職教書，只係希望喺充滿變數與挑戰嘅演藝路上，保留一份相對穩定嘅節奏。
袁文靜稱自八月底獲得港姐頭銜以嚟，佢對藝人生涯已有初步體會，「在這樣的生活裡，我想持續累積知識，也讓自己保持扎實的底氣。今年是我教授經濟學的第五年。雖然只是入門原理，我相信這些基礎概念能為年輕人打開一扇觀看世界的新窗，就像當初它為我做的那樣」。
袁文靜渴望擁有一件能夠做到老嘅事，「如果七十歲的我能說『我已經教了五十年書』，將是與演員拿出代表作同等的驕傲。感謝大家理解」。