汪明荃（Liza姐）與羅家英於1989年已相戀，直到2009年喺拉斯維加斯註冊成婚，日前出發去不丹拍攝新節目《帶阿姐看世界》，兩夫妻喺當地展開行程，家英哥出發前已提議影民族結婚相，面對老公突如其來嘅請求，阿姐就話要諗吓先，家英哥向來言出必行，就真係氹到阿姐影靚相！
阿姐受訪時就話二人喺美國結婚時，冇著婚紗同中式裙褂，家英哥成日問阿姐幾時影結婚相，阿姐都話估唔到嚟到著上不丹傳統服裝影婚照，儀式有大師喇嘛誦經祝福，當地村民仲為佢哋唱歌跳舞慶祝，阿姐覺得好難忘，又讚當地食物幾好食。
家英哥貫徹幽默作風，稱趁佢哋仲後生咁靚靚地咁影一張婚照紀念一下，佢話嚟不丹之前有同監製講過呢個提議，監製就暗中幫忙，家英哥話當時著上當地人結婚著嘅衫，互相祝牛奶，祝佢哋白首偕老、婚姻幸福、家庭美滿，大師仲念經、撒米、灑聖水等，然後阿姐同家英哥就接受村代表嘅祝福，村民跳簡單舞步期間更邀請二人加入，家英哥笑稱達成心願，更甜蜜地伸出左手，跟阿姐握手，阿姐亦相當受落。
