《聲秀》16位學員嚟緊將會合體舉行畢業演唱會，呢日佢哋現身記招者會曬冷為演唱會造勢，吸引大批歌迷支持。隨住幾位聲秀學員人氣越嚟越高，少不免又會被人大起底，好似 柯雨霏 早前就刪除社交平台所有同男友嘅合照，似係想抹走戀愛痕跡，不過男友嘅相片仍然被曝光，呢日佢就解釋自己好耐之前已清空社交平台男友嘅相片，只係因為佢同男友都想低調處理感情事，而男友喺比賽過程一直都好支持自己。
至於Bibi林潔心、周智敏同埋穎喬就話，好希望藉住演唱會，同自己嘅導師crossover。Bibi話比賽以來都未有機會同導師師兄合唱，係一個小小嘅遺憾，所以好希望藉住呢次嘅演出達成夢想。而穎喬亦都話好想同導師胡鴻鈞一齊跳唱，相信會擦出唔少火花。
而陸卓謙、司徒泆同埋胡港豐都話好期待呢次演出，佢哋表示想呈現更多面向，帶比觀眾新鮮感，好似胡港豐話導師譚耀文一直好想佢呈現搖滾風，所以佢都好想呢個機會挑戰下，至於一向跳唱多嘅陸卓謙同埋胡港豐，就話打算當晚唱多啲抒情慢歌，希望為觀眾呈現不一樣嘅感覺。
