資深演員 甄志強 上個月喺上海離世，終年59歲。
11月16日，佢嘅家人喺香港舉行追思會，甄志強嘅太太 方心媛 仍然非常哀傷，更不時飲泣落淚，佢由助手陪伴會面傳媒，由於心情尚未平伏，所以呢日未接受傳媒訪問，佢只係表示甄志強嘅遺體已經火化，所以呢日只係以追思會形式進行。
靈堂佈置簡潔，橫匾寫上「永遠懷念」四字，靈堂正中擺放咗太太方心媛送上嘅心形花牌，而兩旁同門外就擺滿唔少圈中朋友送上嘅花牌，好似陳展鵬同太太單文柔、姜皓文同太太、任達華、方平、鮑起靜、肥媽、區永權、苑瓊丹、黎瑞恩、楊玉梅、蘇志威劉少慧等等。而靈堂上亦播放甄志強昔日嘅生活相片，比一眾好友懷緬。
同甄志強相識多年嘅林韋辰、張文慈、鮑起靜、方平以及張頴康亦嚟到靈堂致祭，林韋辰指甄志強為人內向，唔太擅於社交，但為人踏實。對故友嘅離世感到好突然，因為不時都有同甄志強打高爾夫球同比賽，亦唔察覺對方有異樣，只知道甄志強喺5月時曾經做過心臟通波仔手術，得悉故友離世後，佢都有發短訊慰問甄太。
同樣同甄志強相識多年嘅張文慈，近年不時邀對方任嘉賓直播帶貨，今年亦多次同對方見面，亦知道對方今年曾入院，但無諗過情況咁嚴重。佢話甄志強過往一直當自己係妹妹一樣，亦經常幫佢做嘉賓，張文慈亦大讚甄太非常友善，經常教佢食保健品，所以呢日亦特登過嚟慰問甄太。
