「愛我請留言-世代共融2025」慈善音樂會5月結束後反應熱烈，日前於荃灣大會堂演奏廳再次舉行，活動籌得善款將用作支持弱勢社群。
音樂會以舞台音樂劇形式展現長輩同後輩相處，喚醒大家關懷家中長輩，表演嘉賓包括 關嘉敏 謝東閔 謝高晉 李然 涂家堯 鄧顥懷 等，而赴日學造甜品嘅蘇志威千金 蘇君蕎 更身體力行親手焗製曲奇餅送予入場觀眾。
關嘉敏指從少就獲家人給予無盡愛意，尤其爺爺同嫲嫲。Carman話：「有時會覺得遺憾，但有啲嘢錯過咗就係錯過咗，返唔到轉頭，每個人都需要愛嘅。」佢仲指最難忘嫲嫲煮嘅齋菜：「嫲嫲以前初一、十五必定煮齋菜，每次食完我都會飲好多可樂，因為好口渴，同埋齋菜嘅份量，要食一星期先食得完。自從嫲嫲過身後，每逢初一、十五我都會覺得好空虛，好掛住佢。」
而蘇君蕎親自製造500塊曲奇送予觀眾，又上台分享同家人的相處之道：「屋企人關係好好，唔止同父母，就算姨媽姑姐、嫲嫲都好好，每星期都去嫲嫲屋企食飯，都成2﹑30人，四代同堂好融洽。」佢又透露早前中秋曾小試牛刀於網上銷售自製月餅，反應不俗。聖誕會同庇護工場合作推出禮盒，由身心障礙人士負責處理禮盒內嘅手作畫，幫助佢哋增加收入。
謝東閔即場獻唱兩首歌曲，12月更會於廣州舉行音樂會，早前佢同吳業坤等開設音樂中心，但坦言經濟不景難有錢賺，不過佢積極指：「用心去教，吸引人嚟上堂，大前題都唔係只為賺錢，幫人都好開心！」
而曾參加《中年好聲音》嘅鄧顥懷同涂家堯已係第2次參與呢個慈善騷，兩人都則提醒要珍惜眼前人，鄧顥懷話：「最近我有個阿叔好突然走咗，會覺得點解之前幾年唔多啲搵佢食飯。所以今年都希望返去澳洲探媽咪，想同大家講唔好等，如果掛住屋企老人家，就快啲打畀佢、問候吓其實都好好。」而涂家堯就透露新歌已完成，會計劃一個好嘅時間推出，新歌主題同抑鬱症有關，希望歌曲令大家更關注病症同患者。