吳若希(Jinny)、何沛珈(Roxanne)、楊培琳 (Penny)晨咁早一齊參加慈善跑，Jinny見到500多人齊集做善事，令佢覺得相當熱血，仲講笑話開心過開騷。
嚟緊Jinny會同樂隊Supper Moment首度合作推出新歌，佢都話估唔到咁夾，大家一樣喜歡音樂之餘仲相當容易溝通，Jinny分享完歌曲嘅概念同構思後，Supper Moment好快就創作出歌曲，而錄音時亦快靚正，用咗一節時間就錄起。
講起聖誕佳節，Jinny坦言依家心態轉變，覺得過時過節要陪家人，所以一早請定假，同老公以及小朋友去一個從未旅行過嘅地方，準備飛長白山欣賞當地嘅自然景色，過白色聖誕，仲叫網民留意遊後感。
同場嘅Roxanne有跑開步，所以對呢日嘅五公里賽事應該應付自如。Penny就首度參加馬拉松賽事，當係一個新挑戰。
