「Benz雄」 許紹雄 上月28日離世，消息令外界非常震驚，網上紛紛悼念呢位為香港帶來無盡歡笑嘅演員。
親屬於星期一為Benz雄設靈，大批圈中多年好友花圈放滿靈堂內外，亦以電視屏幕播放佢生前嘅精彩演出片段，靈堂外亦特設位置，公開供市民致祭。一向同佢關係緊密，視佢為契爺 佘詩曼 仲有相識多年嘅 黃子華 抵達時急步走入靈堂，神情穆然，大批好友亦先後抵達靈堂，向Benz雄送上最後敬意。
Benz哥嘅女兒 許惠菁 代表家人接受訪問，佢感激外界對爸爸嘅敬意同愛戴，又指已承諾離世爸爸接手照顧家人，對能成為Benz女兒非常驕傲，會秉承過往佢嘅人生宗旨同優點努力工作待人友善。
過往不時父女檔姿態出現，被視為掌上明珠嘅Charmaine提到，遺憾爸爸走得太早，唔夠時間好好孝順報答，又指母親情緒仍未平復。往後會繼續保留Benz哥嘅社交平台，將佢對人生睇法同笑聲繼續留傳。
三哥苗僑偉同太太戚美珍 一齊到場送別數十年老友，佢受訪問指自己當日收到許太通知趕往醫院時先知對方患病，當時Benz雄已陷昏迷，自己心痛到難以形容，亦冇諗過會係見對方最後一面。40多年來一直受對方照顧，非常痛心亦無窮遺憾。
張家輝 則指Benz係香港無出其奇嘅演員，佢離世係演藝界重大損失，非常可惜。
