前港姐謝嘉怡（Lisa）形象清新健康，最近更決定發展個人事業。Lisa事業得意，感情亦有新動向！
近日有雜誌影到Lisa同一位大隻混血型男著情侶運動裝約會，一開始二人都仲有少少避忌，喺行出停車場時都仲會保持距離，不過呢段距離好快就被蜜運愛火點燃，二人唔只越行越近，男方仲突然從後攬住Lisa，二人情到濃時更喺商場暗角甜蜜錫錫，最後男友開車返回二人喺元朗嘅愛巢。
Lisa出道後自稱係A1，即使只有一次拍拖經驗，亦分享過擇偶條件：「性格要溝通到、要靚仔，要man、大隻、聰明。」佢更表明希望喺2025年可以搵到一個真命天子。而呢位混血男友亦正正中曬Lisa嘅擇偶條件！有消息指，型男叫Andy Cheung，從事品牌宣傳拍攝工作，同Lisa一樣熱愛運動！不過喺二人分享嘅照片可見，兩位喺左手無名指都帶上同款金色戒指，睇嚟Lisa有可能已經低調成為人妻喇！
