原名 劉永偉 嘅資深藝人 煒烈 突傳出被網民於網上公開尋父，正於澳門拍攝新劇《璀璨人生》嘅佢，被傳媒報道指，網上有人表示自己係煒烈兒子而公開尋父，更附上兒時同煒烈嘅合照。
當事人表示雙親分開之後，自己曾見過爸爸幾面，更收過爸爸擺大壽嘅請帖，但知道爸爸有新家庭就未出席，之後更失去聯絡方式。
不過出Post冇耐之後，當事人就指因為「怕將件事搞得太大」而刪帖。
事後有傳媒向煒烈查詢，佢承認對方就係自己多年前同前女友生下嘅囝囝，更指中、英文都出自自己嘅手。煒烈透露前女友細自己十多年，不過誕子後仍未定性，經常飲酒玩樂，自己又忙住開工，唔駛開工嘅日子就會負責湊小朋友。
煒烈媽亦接受唔到新抱行徑，由於二人純同居冇註冊結婚，所以喺囝囝未到一歲時決定分開。煒烈亦曾要求女方將兒子交自己照顧，不過女方唔願意，每次聯絡自己都係為攞錢，呢個原因令煒烈心淡，亦冇再主動提出要見囝囝，又澄清冇向囝囝發過壽宴請帖。
雖然煒烈話自己冇內疚缺席囝囝童年，但佢其實咁多年嚟都有經社交平台尋子，奈何同名同姓嘅人太多，自己亦唔清楚阿仔大個後嘅樣，所以都搵唔到人。佢亦表示，如果父子可以重逢，自己都會好開心，但係當事人刪帖後就未再出現。
煒烈其實係性情中人，雖然62歲先遇上愛人Amy，兩人亦未正式簽字結婚，但佢一直將Amy視為妻子，更堅稱從冇拈花惹草。直到Amy近年癌病復發，煒烈仍然對佢不離不棄，Amy去年病逝後，佢一度難以走出傷痛，更患上抑鬱症及驚恐症。所以唔少網民於公開尋父事件後，都希望父子可以團聚，令煒烈有個圓滿晚年。
