台灣藝人 邱澤 同 許瑋甯 因拍戲結緣，戲假情真發展成為情侶，並於2021年結婚。今年夏天亦升級成為新手父母，誕下兒子Ian。兩人喺即將結婚滿4周年之際，今日（11月19日）宣布將於下週五（11月28日）補辦婚禮，更公開兩張甜蜜婚照。
第一張雖然係黑白相，但兩人神態甜蜜，瑋甯更舉手展現婚戒，難掩濃情蜜意，另一張彩色相瑋甯表現調皮，用手托住下巴嘟晒嘴，邱澤就擺出一副Cool樣。兩張相都閃度十足，而兩人亦感謝大家祝福。
雖然邱澤同瑋甯對感情一直低調處理，夫妻生活簡單貼地，仲有網民偶遇佢地喺台北踩單車拍拖，為咗避免喺街頭影響交通，特登拉開一小段距離。瑋甯亦喺社交平台限時動態分享夫妻互拍視角，令大家都話好甜啊！
兩人做咗父母後亦變得有仔萬事足，早前佢地分別出席公開活動時，一講到囝囝就即刻冧曬，瑋甯仲大爆老公自從做咗爸爸後變得感性，邱澤亦自認容易喊咗好多，有次搭搭下車睇風景，突然想寫一封信俾囝囝，結果自己諗諗下就喊咗出嚟。
