五月天25周年世界巡唱會，上海站六場圓滿落幕，五子向來鍾意同後輩合作，所以喺上海尾場，佢哋就邀請韓國人氣女團i-dle嘅中國籍成員 宋雨琦 擔任嘉賓。阿信同雨琦唔只合唱五月天嘅經典情歌《後來的我們》，更合唱雨琦新歌《Radio (Dum‐Dum)》，呢個夢幻聯動令大家都好驚喜！
雖然五月天同雨琦年齡有段大差距，但12月就踏入50歲嘅阿信性格仍然係大細路，同雨琦互動嘅時候玩得好投契。雨琦仲即場教阿信跳自己新歌嘅舞蹈，對跳舞唔多擅長嘅阿信亦跳得有板有眼，不過隊友們就睇到忍唔住笑。
其實五月天初出道時都有跳過男團舞，所以五迷見到阿信難得肯跳，大家都話「多謝雨琦令跳舞小陳重出江湖」，仲向阿信許願，希望佢喺下個月廣州同台中演唱會都要繼續跳舞添！
