一年一度嘅《萬千星輝賀台慶》隆重舉行，全台超過300藝員傾巢而出為台慶落力演出慶祝TVB 58歲生日，紅地氈更係星光熠熠。出席藝人包括：馬國明、陳展鵬、譚俊彥、陳煒、張振朗、劉穎鏇、蕭正楠、姚子羚、羅子溢、黃翠如、蔡潔、吳偉豪、周嘉洛、陳懿德、吳偉豪、何廣沛、劉佩玥、吳業坤、何晉樂、古佩玲、樊亦敏、馬貫東、何依婷、賴慰玲、羅天宇、孔德賢、郭柏姸、黃庭鋒、戴祖儀、張馳豪、陳貝兒、龔嘉欣、張曦雯、丁子朗、鄭衍峰以及中聲家族、聲夢家族、聲秀家族、愛回家劇組、東張女神們、歷屆港姐亦齊齊踏上紅地氈，非常熱鬧。
《女神配對計劃》嘅葉蒨文、曾展望、羅毓儀、林俊其，兩對情侶齊齊行紅地氈閃過閃光燈，而單身女神關嘉敏、李芷晴、梁敏巧嘅著裝都非常搶眼奪目。
雖然天寒地凍，不過一眾女明星毫不畏懼，以最華麗晚裝登場，展現好身材。 鍾柔美同詹天文嘅白色晚裝優雅得嚟充滿少女感，Windy嘅長裙仲有露背效果，完全大個女喇！不過最搶眼嘅其中一位，就絕對係肥媽嘅一身綠色旗袍加毛毛斗篷雍容華貴，阿媽就話特意揀綠色襯返TVB，要青春一啲。
第一年參與台慶嘅中聲3成員心情興奮，黃博、劉洋、李金凱、張與辰喺揀衫時都特別落足心思，劉洋笑言，要奢華得嚟有內涵。
