藝人馬貫東除咗係演員外，佢亦擁有寵物美容師身份，就連佘詩曼、郭晉安、周嘉洛及張曦雯都係佢嘅星級客人，會帶自己嘅毛孩俾佢幫手扮靚靚！最近阿東就幫陳煒嘅愛貓「藍藍」同「豆豆」沖涼，仲喺社交平台分享片段，形容兩隻貓係「天使與魔鬼」呀。
阿東表示：「多謝煒哥，帶兩隻可愛嘅貓貓畀我沖涼，貓貓性格完全不一樣，不過一樣好可愛。」藍藍全程非常淡定乖巧，而豆豆就驚到張牙舞爪，唔只成隻貓彈到阿東身上，仲出爪抓實阿東，令煒哥都非常抱歉：「實在辛苦晒啦，醫藥費我出。」作為暖男嘅阿東亦有安慰返煒哥，表示：「你已經請咗我哋食炸雞啦，加上我哋完全冇受傷，下次豆豆過嚟唔會再係咁㗎啦。」
事後阿東再度拍片為豆豆平反，解釋唔同唔同品種嘅貓有唔同嘅性格，豆豆係聰明豆，唔係成個過程都咁百厭，都有好乖嘅時候。
