《第46屆韓國電影青龍獎》頒獎禮19號晚隆重舉行，今屆最大焦點就係玄彬同孫藝真夫妻雙雙同時入圍影帝影后！兩位最後不負眾望，成功奪得大獎。玄彬憑《哈爾濱》打敗一眾強敵勇奪青龍影帝，而孫藝真就憑《選擇有罪》大熱封后，二人獲獎一刻第一時間擁抱對方，發表得獎感言時更大方放閃。孫藝真喺台上以玄彬本名「金泰坪」稱呼老公，仲意外將囝囝「小甜豆」真名「金宇振」公開。孫藝真表示，老公同囝囝係自己「世上最摯愛嘅男人」，真係好閃！
呢晚紅地氈上眾星雲集，包括擔任頒獎禮司儀嘅李帝勳同韓志旼；有份入圍影帝嘅薛景求、朴正民、曹政奭；入圍影后嘅潤娥、李在仁、李慧英；由公仔箱躍上大銀幕，得到最佳新人男演員嘅安普賢，同佢競逐同一個獎項嘅安孝燮、朴珍榮；最佳新人女演員金度延；最佳男配角實李星民；最佳女配角朴智賢。
另外仲有廉惠蘭、全汝彬、李彩玟、盧允瑞、李姃垠、鄭星一、李先彬、尹敬浩、金聖喆、金載原、金敏周、申賢彬等現身紅地氈，場面星光熠熠
