現年74歲嘅影帝鄭則仕，近期經常喺小紅書拍片分享近況，不過因為身形暴瘦，加上全白鬍鬚略顯憔悴，令好多影迷擔心佢嘅健康狀況，Kent哥索性拍片自抽，兼親自回應種種傳聞。
由於Kent哥曾經誤傳烏龍死訊，所以影片一開始佢就揸住份報紙證明自己今時今日仲在生，仲攞自己2021年嘅烏龍死訊來講笑，不過Kent哥對於所有傳聞並非一概否認，當中都有啲係事實。「說我當年生意失敗，賣掉所有家當還債，是真的。說我一家人住了好多年貧民窟，是假的。」
至於暴瘦，Kent哥就承認自己由270斤瘦到而家嘅200斤，不過並非健康出狀況，佢話：「是因為年紀大了，身體承受不了，會有很多毛病出來，為了想自己健康、輕鬆，所以必須要減肥。」至於留白鬚顯得憔悴，Kent哥就話係因為角色需要，等電影煞科就可以還原本來面貌。
影片最後，Kent哥大騷自己減肥成功後嘅體態，對住鏡頭又跑又跳，步伐輕盈，Kent哥仲不忘提醒大家，科技進步，好多嘢都可以作假，「真真假假，耳聞絕不能信，就算目睹也可能是假的，所以要力求真相。」
