「愛啡之人」陳豪唔只鍾意飲咖啡，亦有經營自己嘅咖啡店。不過近日有指阿Mo其中一間鋪頭突然結業，令大家都好關心結業原因。呢日阿Mo出席一個活動時都有為事件作解釋，佢表示店舖結業係因為業主收返做其他用途，其實咖啡店生意唔錯，所以佢都有考慮搵其他地方再開店。
阿Mo雖然工作忙碌，但佢都好重視同仔女嘅親子時光，而揸車送佢地返學放學就係一個好好嘅傾偈時間。阿Mo話囡囡比較「透明」冇咩心事收埋，不過大仔年歲漸長就反而開始有心事，需要加把勁令阿仔講。但呢個舉動並唔係想探究小朋友有咩秘密，而係想囝囝知，可以向家人開口講心事。
