韓國男神宋仲基、韓國演員安賀營以及古天樂、廖子妤、余香凝、胡子彤、朱鑑然等一眾藝人呢日現身一個時尚活動，宋仲基難得嚟到香港，唔只粉絲興奮，佢都話覺得好開心！因為佢中學嘅畢業旅行就係嚟香港，所以呢次一落機已經覺得被勾起好多回憶，酒店亦有好多美食。
至於被問到最想同邊位香港演員合作時，宋仲基就話係梁朝偉同導演劉偉強，因為自己有睇《無間道》電影，亦好鍾意，所以特別想同兩位合作。講到未來最想挑戰咩類型嘅作品，佢就話係恐怖片同埋宣傳韓國、亞洲文化類型嘅戲。
古天樂早前因為眼疾而需要開刀兼長期戴墨鏡，不過古仔喺活動上就同大家報平安，表示飛蚊症已經好返喇！
古仔同宣萱老友鬼鬼亦係觀眾心中嘅經典螢幕情侶，而宣萱最近喺社交平台分享一張「拖手相」，令唔少人都估男主角係咪古仔，雖然宣萱已經否認，但二人仍然被靚好登對，加上宣萱喺貼文表示「Pure Friendship」，所以仍然有人覺得係直指古仔。但古仔就話，宣萱呢一句係指相中主角，而主角係邊個就唔應該問佢喇。
台灣男星逃兵風波涉及唔少當紅藝人，曾經同余香凝合作嘅陳柏霖都係其中一位涉案男星。Jennifer就話，既然當事人已經回應咗，希望外界可以俾啲空間佢，自己亦唔擔心新戲上映會受到影響。
