經典劇集《包青天》中飾演展昭嘅 何家勁 ，早年已經將重心轉移內地發展。久未喺香港露面嘅展大俠，獲邀擔任健康大使，兼且為自資生意做推廣而專程返港。家勁表示好耐冇返香港，今次係難得機會。
現年65歲嘅家勁，無論樣貎同外型都係凍齡一樣，佢話自己一向都鍾意做運動，加上健康飲食同注意休息。佢鼓勵大家要多做運動，按自己年齡揀選合適運動，最重要係抱住堅持嘅心態，因為堅持先會有成效。
息影多年，家勁直認一直有人邀約出山，不過佢已經無戲癮，加上忙於做生意，分身不下。佢話若果係客串演出，做完又可能冇人知，若果演重戲份角色，自己又冇時間。話雖如此，但觀眾仍然有機會見到家勁嘅演出，佢表明若果係演中華英雄，佢就會復出幕前。
